環保風雲人物 ：Loop Store 環圓生活 創辦人 Bear Chan

認識 #ecostorerefill 香港補充伙伴

 

大家一齊認識 Bear Chan –  ecostore 零售同補充站夥伴 Loop Store 嘅創辦人。 Loop Store 係位於西灣河嘅裸買商店。 喺創立 Loop Store 之前，Bear從事時裝工作，一直過著環保嘅生活方式。她鍾意補充自己嘅日用品，但發現好難喺自己嘅社區搵到補充嘅選擇，咁就激勵佢喺屋企附近開設自己嘅零廢商店。就咁樣，Loop Store 誕生喇！Bear係 一個有環保抱負嘅人，渴望對減廢有所貢獻，令世界變得更美好。而家佢唔單止可以隨時補充自己嘅產品，而且仲邀請大家加入，將自己嘅容器帶到佢舖頭。 

以下Bear 會分享一下佢嘅環保之旅，同埋佢對香港零廢運動嘅一啲睇法，仲有就係 Loop Store 嘅未來發展去向。 

 

1. 你係咩時候開始零廢之旅？發生咗咩事激發起你想過零廢生活？

 

Bear：呢個係一個好長嘅故事：我喺香港理工大學修讀時裝同紡織，畢業後，我喺呢個行業工作咗超過16年。我喺唔同嘅快速時裝 (fast fashion) 公司工作，嗰時我對環保相關嘅問題一無所知，完全唔係一個環保戰士！大約兩、三年前，我喺度整理浴室，面對一個個堆累如山嘅樽，非常淩亂，我執到好攰好沮喪。自此我就決定購買一啲簡單嘅樽，然後只買洗髮水/沐浴露嘅補充包。 做咗好幾次之後，我意識到我需要嘅係液體本身，而唔係新樽。我嘗試搜尋我住嗰區，搵下有冇一間舖頭只係賣液體，但搵唔到。呢個就係我零廢之旅嘅開始。喺我開始零廢生活之後，我一直希望屋企附近會有一間裸買商店。 另外，我喺2022年會踏入40歲。對我嚟講係開始成熟嘅時候，亦都係迎接新挑戰嘅好時機。一個全新嘅計劃而且對社區又咁有意義，我感到好興奮同雀躍。 

 

2. 不如介紹一下 Loop Store：舖頭裡面有乜產品？嚟緊會有咩新計劃？

 

Bear：喺Loop Store入面，你會搵到大量嘅美食。我哋嘅產品包括乾果、健康零食、香蕉糕、雞仔餅、有機腰果糖等傳統港式小吃，仲有香草、堅果、香料、醬油、麵粉、日本大米、意大利粉、奇亞籽。我哋都有一啲得意嘅茶，例如威士忌茶同芒果茶。喺冷凍區，我哋有本地製造嘅貝果、牛角包、朱古力熔岩蛋糕。飲品方面有香港嘅咖啡同奶茶。 除咗飲品同食物，我哋當然仲有個人護理用品同家庭清潔用品。以上所有商品都係批量銷售。 我計劃嚟緊會同附近嘅餐廳合作，鼓勵大家喺外賣食物時使用自己嘅食物盒，希望好快可以推行。   

 

3. 經營自己嘅零廢商店最開心嘅事係乜？同埋遇到咩挑戰？

 

Bear：儘管零廢商店暫時都唔係咁普及，但係我好開心可以認識好多有相同志趣嘅新朋友，令我覺得我朝住啱嘅方向發展。而喺日常營運上，我哋必須要解決儲存嘅問題，喺溫度、濕度方面都要管理得好好。而喺供應商嘅層面，我哋需要花大量時間去尋找合適而又提供環保產品嘅供應商，盡可能支持一啲了解零廢概念嘅小型企業。  

 

4. 對於有興趣開始更環保/零廢嘅生活方式嘅人，你有乜建議/提示？佢哋應該由邊度開始？

 

Bear：我建議佢哋先從個人護理用品開始，就好似我開始時咁樣。冇嘢比將空樽帶到裸買商店裝滿佢哋更容易喇！只係簡單地每個月裝一次洗頭水、沐浴露等，一個小嘅變化，但影響可以好大。   

 

5. 喺環保及零廢運動方面，有啲咩係你睇到其他國家做緊，而你又希望喺香港都睇到？

   

Bear：我希望將一台液體自動售賣機帶到香港。呢款機器喺其他國家愈嚟愈受歡迎，例如紐西蘭、法國同台灣。即使喺澳門，都有兩台出售個人護理用品嘅液體自動售賣機。事實上，喺我成立 Loop Store 之前，我將呢個建議提出過比香港最大嘅自動售賣機公司，可惜佢哋並冇興趣。希望有一日我能夠令呢件事成真！